Əkrəm Şəkinski

Əkrəm Şəkinski
Şəkinski Əkrəm Məmmədəmin oğlu
Əkrəm Şəkinski.
Azərbaycan Respublikası Geologiya və Mineral Ehtiyatlar Komitəsinin Sədri 8 noyabr 1991 — 25 iyun 1998
Sələfi	vəzifə təsis edilib
Azərbaycan SSR Nazirlər Soveti Geologiya Baş İdarəsinin Rəisi 19 aprel 1974 — 8 noyabr 1991
Xələfi	vəzifə ləğv edilib
Azərbaycan SSR Ali Sovetinin IX çağırış deputatı 1980 — 1984
Azərbaycan SSR Ali Sovetinin X çağırış deputatı 1985 — 1990
Şəxsi məlumatlar
Doğum tarixi	16 noyabr 1929(1929-11-16)
Doğum yeri	Bakı, Azərbaycan SSR, SSRİ
Vəfat tarixi	25 iyun 1998 (68 yaşında)
Vəfat yeri	İstanbul, Türkiyə
Atası	Məmmədəmin Şəkinski
Həyat yoldaşı	Fərəh Şəkinskaya
Uşağı	Emin Şəkinski
Təhsili	M.Əzizbəyov adına Azərbaycan Sənaye İnstitutu, geoloji-kəşfiyyat fakültəsi (–1954)
Təltifləri

Əkrəm Şəkinski (1929–1998) — görkəmli mühəndis-geoloq, Azərbaycan Respublikası Geologiya və Mineral Ehtiyatlar Komitəsinin sədri.

Haqqında məlumatlar

16 noyabr 1929-cu il tarixdə Bakıda anadan olub.

Təhsili

1954-cü ildə M.Əzizbəyov adına Azərbaycan Sənaye İnstitutunun geoloji-kəşfiyyat fakültəsini bitirib.

Əmək fəaliyyəti

Yeniyetmə yaşlarında Xəzər Donanmasının İstehsalat kombinatının çörəkxanasında usta köməkçisi, sonralar SSRİ “Baştunelmetrotikinti” İdarəsinin Bakıdakı Baş Markşeyder İdarəsində böyük fəhlə, kiçik texnik-geodeziyaçı, daha sonralar isə əvvəl “Azneft” birliyinin Dənizdə Geofiziki Kəşfiyyat İdarəsində seysmik kəşfiyyat partiyasının böyük radiotexniki, sonra idarənin baş mühəndisi vəzifəsində işləyib.

1966-1968-ci illərdə “Texnoeksport” Ümumittifaq Birliyi ilə İran neft kompaniyası arasında bağlanmış müqavilənin məsləhətçi-rəhbəri kimi İrana xidməti ezamiyyətdə olub.

1969-cu ildə SSRİ Neft Sənayesi Nazirliyinin “Azneftgeofizkəşfiyyat” Trestinin müdiri vəzifəsinə təyin olunub.

1974 – 1991-cü illərdə Azərbaycan SSR Nazirlər Soveti Geologiya İdarəsinin rəisi,

1991 – 1998-ci illərdə isə Azərbaycan Respublikası Geologiya və Mineral Ehtiyatlar Komitəsinin sədri vəzifəsində çalışıb.

İctimai-siyasi fəaliyyəti

X və XI çağırış Azərbaycan SSR Ali Sovetinin deputatı olub.

Digər

Xarici ölkələrlə iqtisadi əməkdaşlığa dair danışıqlar aparmaq məqsədilə SSRİ hökumət komissiyalarının heyətində - 1969-cu ildə İranda, 1973-cü ildə Nigeriyada olmuşdur.

Bir sıra dövlət və hökumət komissiyalarının üzvü olmuş, Sovet İttifaqı nümayəndə heyətinin tərkibində 1989-cu ildə ABŞ-ın Vaşinqton şəhərində keçirilmiş XXVIII Ümumdünya Geoloji Konqresin işində iştirak etmişdir.

Təltif və mükafatları

“Qırmızı Əmək Bayrağı” və “Şərəf nişanı” ordenləri ilə, medallarla, Azərbaycan SSR Ali Sovetinin Fəxri fərmanı ilə təltif olunub.

“Azərbaycan SSR əməkdar geoloqu” və “SSRİ Yer təkinin fəxri kəşfiyyatçısı” fəxri adlarını alıb.

Vəfatı

25 iyun 1998-ci il tarixdə − 68 yaşında, İstanbul şəhərində xidməti ezamiyyətdə olarkən vəfat edib. Bakıda Fəxri xiyabanda dəfn olunub.

Ədəbiyyat

1. Məmmədov Ə., Xalıqov F. Şəkinski Əkrəm // Şəki: Alim və ziyalılar. — Bakı: Bakı Universiteti Nəşriyyatı, 2002. — 2 cilddə. — I  cild. — Səhifələrin sayı:  582. — Səh.: 523. — 1.000 nüsx.
2. Yusifzadə Y., Əlizadə Y., Quliyev A. Əsl vətəndaşlıq nümunəsi : [arx. 16.11.2020] // Anl.az. — 2009. — 15 noyabr. — Müraciət tarixi: 24.07.2021.