Həmid Rəsulov

Həmid Rəsulov
Rəsulov Həmid Lətif oğlu
Həmid Rəsulov.
Doğum tarixi	27 iyun 1926(1926-06-27)
Doğum yeri	Nuxa, Azərbaycan SSR, ZSFSR, SSRİ
Vəfat tarixi	1984(1984-Şablondakı doğum və ya ölüm tarixində texniki yanlışlıq var!-00) (58 yaşında)
Vəfat yeri	Bakı, Azərbaycan SSR, SSRİ
Vəfat səbəbi	parkinson xəstəliyi
Dəfn yeri	Bakı
Vətəndaşlıq	SSRİ
Elm sahəsi	geologiya-mineralogiya
Elmi dərəcəsi	geologiya-mineralogiya elmləri namizədi
Elmi adı	baş elmi işçi (dosent)
Təhsili	S.M.Kirov adına Azərbaycan Dövlət Universiteti, geoloji-coğrafiya fakültəsi, mühəndis-geoloq ixtisası (1950–1956)
Həyat yoldaşı	Almas Hüseynbəyova
Elmi rəhbəri	geologiya-mineralogiya elmləri doktoru M.H.Ağabəyov

Həmid Rəsulov (1926–1984) — geologiya-mineralogiya elmləri namizədi, baş elmi işçi (dosent), Azərbaycan SSR EA Geologiya İnstitutunun böyük elmi işçisi. Akademik Məcid Rəsulovun qardaşıdır.

Haqqında məlumatlar

27 iyun 1926-cı ildə Nuxada anadan olub.

1928-ci ildə atası – keçmiş məşhur ipək sənayeçisi Hacı Lətif, ailəsi ilə birlikdə Tsxmok qəsəbəsinə (Gürcüstan SSR) sürgün olunub. Daha sonra isə Hacı Lətif ailəsi ilə birlikdə Aral dənizindəki Kokaral adasına (Qazaxıstan MSSR) sürgün olunub və o, 1930-cu ildə orada da vəfat edib. Bundan sonra isə mərhum Hacı Lətifin bütün ailəsi, o cümlədən, Həmid Rəsulov da Nuxaya qayıdıb.

Təhsili

1944-cü ildə Bakı şəhər 132 №-li orta məktəbini bitirib.

1950 – 1956-cı illərdə S.M.Kirov adına Azərbaycan Dövlət Universitetinin geoloji-coğrafiya fakültəsində mühəndis-geoloq ixtisası üzrə təhsil alıb.

Böyük Vətən müharibəsində

1944-cü ilin dekabr ayında orduya çağırılıb, leytenant rütbəsi ilə Böyük Vətən müharibəsində iştirak edib.

Elmi fəaliyyəti

1963-cü ildə geologiya-mineralogiya elmləri doktoru M.H.Ağabəyovun rəhbərliyi ilə “Qərbi Azərbaycanın Küryanı rayonunun geoloji quruluşu və neft-qazlılıq perspektivliyi” mövzusunda namizədlik dissertasiyasını müdafiə edib.

1969-cu ildə Azərbaycan SSR EA Rəyasət Heyətinin qərarı ilə ona neotektonika ixtisası üzrə baş elmi işçi (dosent) adı verilib.

Dərc olunmuş 30 elmi işin müəllifidir. Elmi forum, simpozium, konfrans və sessiyalarda məruzələrlə çıxış edib.

1978-ci ildə “Qərbi Azərbaycanın Küryanı rayonunun geoloji quruluşu” adlı monoqrafiyası “Elm” nəşriyyatında rus dilində çap olunub.

Əmək fəaliyyəti

Azərbaycan SSR EA Geologiya İnstitutunda əvvəl kiçik elmi, daha sonra isə böyük elmi işçi vəzifəsində çalışıb.

Vəfatı

1984-cü ildə – 58 yaşında, parkinson xəstəliyindən Bakıda vəfat edib. Bakıda da dəfn olunub.

Ədəbiyyat

1. Расулов Гамиз Лятиз-оглы : [arx. 02.09.2022] : [rus.] // Память народа. — Müraciət tarixi: 02.09.2022.
2. Məmmədov Ə., Xalıqov F. Rəsulov Həmid // Şəki: Alim və ziyalılar. — Bakı: Bakı Universiteti Nəşriyyatı, 2002. — 2 cilddə. — I  cild. — Səhifələrin sayı:  582. — Səh.: 477. — 1.000 nüsx.

Həmçinin, bax:

• Məcid Rəsulov
• Almas Hüseynbəyova