Fuad Abdurahmanlı

Fuad Abdurahmanlı (1986–2014) — gənc araşdırmaçı-jurnalist, “Türküstan” qəzeti saytının redaktoru, Ankara Universitetinin siyasi elmlər fakültəsinin magistrantı.

Fuad Abdurahmanlı
Abdurahmanlı Fuad Şahin oğlu
Fuad Abdurahmanlı.
Anadan olub	10 oktyabr 1986(1986-10-10)
Anadan olduğu yer	Şəki, Azərbaycan SSR, SSRİ
Vəfat edib	21 sentyabr 2014 (27 yaşında)
Vəfat etdiyi yer	Şamaxı rayonu, Mirikənd, Azərbaycan
Vəfat səbəbi	avtomobil qəzası
Həyat yoldaşı	Lalə Abdurahmanlı
Atası	Şahin Abdurahmanlı
Vətəndaşlıq	SSRİ → Azərbaycan
Təhsili	• Sumqayıt Dövlət Universiteti, politologiya fakültəsi, bakalavriat (2004–2008)  • Ankara Universiteti, siyasi elmlər fakültəsi, magistratura (2013–)
Tanınır	Fuad Turan Abdurahmanlı
facebook səhifəsi

Haqqında məlumatlar

10 oktyabr 1986-cı il tarixdə Şəkidə anadan olub.

Təhsili

1993 – 1997-ci illərdə Şəki şəhər 8 saylı orta məktəbdə,

1997 – 2003-cü illərdə Bakı şəhər 17 saylı orta məktəbində orta,

2004 – 2008-ci illərdə Sumqayıt Dövlət Universitetinin politologiya fakültəsində bakalavr pilləsi üzrə təhsili alıb.

2013-cü ildən isə Ankara Universitetinin siyasi elmlər fakültəsinin magistraturasında təhsil alırdı.

Jurnalist fəaliyyəti

2012-ci ildən ömrünün sonunadək “Türküstan” qəzetinin eyni adlı saytının redaktoru vəzifəsində çalışıb.

İctimai aktivliyi

Uzun müddət Dünya Azərbaycanlıları Konqresi (DAK) sıralarında təmsil olunub, Dünya Azərbaycanlıları Konqresi Gənclər Təşkilatında fəaliyyət göstərib, həyatının son illərində DAK Məşvərət Məclisinin üzvü idi.

Digər

2008 – 2009-cu illərdə hərbi xidmətdə olub.

2012-ci ildə Azərbaycan Respublikasının Prezidenti yanında Strateji Araşdırmalar Mərkəzinin daxili siyasətin təhlili şöbəsində təcrübə proqramını tamamlayıb. Təcrübə proqramı çərçivəsində “Sol düşüncə sistemi” mövzusunda elmi iş müdafiə edib.

Ailəsi

2012-ci ildə Lalə Abdurahmanlı ilə ailə həyatı qurmuşdur.

Vəfatı

21 sentyabr 2014-cü il tarixdə – 27 yaşında, Bakı-Şamaxı avtomobil yolunda baş vermiş avtomobil qəzasında həlak olub. Şəkidə dəfn edilib.

Xatirəsi

Vəfatından 40 gün keçdikdən sonra “Türküstan” qəzeti onun xatirəsinə xüsusi buraxılış həsr edib. “Tanrı dağında bizi gözlə,.. Fuad!” adlı buraxılışda bir sıra ictimai xadimlərin, millət vəkillərinin, ziyalıların, jurnalistlərin və digər şəxslərin onunla bağlı düşüncələri yer alıb.

10 oktyabr 2015-ci ildə Fuad Abdurahmanlının xatirəsinə həsr olunmuş “Fuad Turan Fondu” və bu fondun təsis etdiyi “Fuad Turan” mükafatının təqdimat mərasimi keçirilib. Fondun əsas məqsədi ediləcək şəxsi yardımlar, eləcə də fondun hər il təşkil edəcəyi xeyriyyə aksiyalarından əldə edilən ianələr hesabına azərbaycanlı gənclərin xaricdə təhsil almasına yardım etməkdir. Tədbirdə fondun idarə heyətinin Əminə Əliyevanı “Fuad Turan Fondu”na sədr seçdiyi elan olunub. Fond hər il ənənəvi olaraq, Fuad Turan Abdurahmanlının doğum günündə eyniadlı fond tərəfindən il ərzində öz sahəsində uğur qazanan bir azərbaycanlı gəncə “Fuad Turan” mükafatının təqdim olunmasının nəzərdə tutub. 2015-ci ildə mükafatın ilk sahibi ADA universitetinin tələbəsi İsmayıl Zeynallı olub.