Ələfsər Rəhimov

Ələfsər Rəhimov
Rəhimov Ələfsər Məmmədrəhim oğlu
Ələfsər Rəhimov.
Şəxsi məlumatlar
Doğum tarixi	5 may 1930(1930-05-05)
Doğum yeri	Nuxa (indiki Şəki), Azərbaycan SSR, SSRİ
Vəfat tarixi	1 dekabr 1984 (54 yaşında)
Vəfat yeri	Şəki, Azərbaycan SSR, SSRİ
Dəfn yeri	Şəki
Vətəndaşlığı	SSRİ
Ləqəbi	Ələfsər Şəkili
Musiqi alətləri	zurna, balaban, qaboy və klarnet
Təhsili	Nuxa Orta İxtisas Musiqi Texnikumu (1963–1967)

Ələfsər Rəhimov (1930–1984) — tanınmış zurna ifaçısı; zurna alətində yenilik edərək onda səkkizinci dəliyi açmış, bu alətin imkanlarının artmasına, daha gözəl səslənməsinə nail olmuşdur.

Haqqında məlumatlar

5 may 1930-cu ildə Nuxada (indiki Şəki) anadan olub.

Təhsili

1963 – 1967-ci illərdə Nuxa Orta İxtisas Musiqi Texnikumunda təhsil alıb.

Əmək fəaliyyəti

1962 – 1977-ci illərdə Nuxa/Şəki Şəhər Mədəniyyət Evində bədii rəhbər və direktor vəzifəsində çalışıb.

Sənətkar kimi fəaliyyəti və uğurları

1956, 1957 və 1962-ci illərdə Bakıda keçirilmiş Azərbaycan SSR gənclərinin festivallarında laureat adına layiq görülüb, birinci dərəcəli diplom və qızıl medalla mükafatlandırılıb. 1959-cu ildə isə Moskvada keçirilən Azərbaycan İncəsənət və Ədəbiyyatı günlərində “Şəki toyu” rəqs kollektivini bacarıqla müşayiət edən zurnaçılar dəstəsinə rəhbərlik edib.

1967-ci ildə Ümumittifaq xalq yaradıcılığı festivalının laureatı olub.

1974-cü ildə ifa etdiyi “Şur”, “Segah”, “Qatar” muğamları, “Şəki yallısı”, “Cəngi”, “Koroğlu”, “Pəhləvani” və digər rəqslər Azərbaycan radiosunun “Qızıl fond”una daxil edilib.

1977-ci ildə isə zəhmətkeşlərin bədii yaradıcılıq festivalının laureatı olub.

Zurnaçılar dəstəsi ilə birlikdə “Dəli Kür”, “Yeddi oğul istərəm”, “Yenilməz batalyon” filmlərinə çəkilib.

1983-cü ilin may-iyun aylarında Fransada keçirilən beynəlxalq musiqi festivalında, 1984-cü ilin mayında isə Belçikada Rəşid Behbudovun rəhbərlik etdiyi Mahnı Teatrı ilə birlikdə qastrol səfərində iştirak edib.

Tanınmış şəxslər onun haqqında

Bəxtiyar Vahabzadə, Məmməd Aslan, Aşıq Şəmşir və başqaları ona şeirlər həsr etmişlər. Bəxtiyar Vahabzadə Ələfsər Rəhimov haqqında demişdir: “Mən hər dəfə Ələfsəri dinləyəndə ayaqlarım yerindən üzülür, xalqımın keçdiyi min illik yollarından keçir, tariximizə – ulu babalarımızın ruhuna qovuşuram”.

Vəfatı

30 noyabr 1984-cü il tarixdə – qardaşının evində, ailə münaqişəsi zəminində öz qohumu tərəfindən bıçaqlanmış, dekabrın 1-də – 54 yaşında, xəstəxanada vəfat etmişdir.

Ailəsi

Ələfsər Rəhimovun nəvəsi Ələfsər Rəhimov Əməkdar artist Natiq Şirinovun rəhbərlik etdiyi “Natiq” ritm qrupunun fəal üzvlərindən biri olub.

Xatirəsi

Şəki Musiqi Texnikumu bir müddət onun adını daşıyıb.

1990-cı ildə 60, 2000-ci ildə 70 illik yubileyləri keçirilmişdir. 2010-cu ilin oktyabrında Mədəniyyət və Turizm Nazirliyi tərəfindən Şəkidə Ələfsər Rəhimovun 80 illiyinə həsr olunmuş “Milli nəfəs alətləri” bayramı təşkil olunub.

Şəki Şəhər Mərkəzi Mədəniyyət Evində Ələfsər Şəkili adına zurnaçılar ansamblı fəaliyyət göstərib.

Ədəbiyyat

1. Məmmədov Ə., Xalıqov F. Rəhimov Ələfsər // Şəki: Alim və ziyalılar. — Bakı: Elm, 2007. — 2 cilddə. — II  cild. — Səhifələrin sayı:  428. — Səh.: 327-328. — 600 nüsx. — ISBN 5-8066-1708-4.
2. Kərimov V. (21-12-2012). "Yaddaşlarda yaşayan el sənətkarı". http://medeniyyet.az (azərb.). “Mədəniyyət” qəzeti.
3. Qvami Məhəbbətoğlu (4 noyabr 2015). ""Belə getsə, elə nəzərdə tutula-tutula qalacağam"". http://anl.az (azərb.). “Zaman” qəzeti. 28 Jul 2019 tarixində arxivləşdirilib.
4. Təhmirazqızı S. Ələfsər Rəhimov // Şəkidə ifaçılıq sənəti. — Bakı: Nərgiz, 2016. — Səhifələrin sayı:  224. — Səh.: 112. — 300 nüsx.
5. Xatirələrdə yaşayan ustad sənətkar : [arx. 30.05.2020] // Mədəniyyət qəzeti. — 2020. — 20 may. — Müraciət tarixi: 25.05.2023.