İsmət İsmayılov

İsmət İsmayılov
İsmayılov İsmət Şirəli oğlu
İsmət İsmayılov.
Doğum tarixi	14 iyul 1924(1924-07-14)
Doğum yeri	Qudula, Şəki qəzası, Azərbaycan SSR, ZSFSR, SSRİ
Vəfat tarixi	7 dekabr 2010 (86 yaşında)
Vəfat yeri	Şəki, Azərbaycan
Dəfn yeri	Məhəmməd əfəndi qəbiristanlığı, Şəki, Azərbaycan
Vətəndaşlığı	SSRİ → Azərbaycan
Təhsili	• Azərbaycan Dövlət Rəssamlıq Məktəbi (natamam)  • Kommunal-Tikinti Texnikumu
Mükafatları
Uşaqları	Hikmət (1953–2013) və Bahar
Həyat yoldaşı	Naimə Şəkixanova Məmmədxan qızı (1926–2010)

İsmət İsmayılov (1924–2010) — tanınmış rəssam, SSRİ Rəssamlar İttifaqının üzvü və Azərbaycan SSR əməkdar rəssamı. Yaradıcılığının əsas istiqamətləri qrafika, rəngkarlıq (xüsusən, portret), tətbiqi sənət (parçaların bədii tərtibatı, ağac üzərində bədii oyma, nəqqaşlıq) idi.

Haqqında məlumatlar

14 iyul 1924-cü il tarixdə Şəki qəzasının Qudula kəndində anadan olub.

Təhsili

Nuxa şəhər 7 №-li orta məktəbini bitirib.

Əvvəl Azərbaycan Dövlət Rəssamlıq Məktəbinə daxil olub, lakin ailə vəziyyətinə görə təhsilini kommunal-tikinti texnikumunda davam etdirib.

Hərbi xidmətdə

1943-cü ilin avqust ayında ordu sıralarına çağırılıb. Qısamüddətli serjant (çavuş) məktəbini bitirib.

Əmək fəaliyyəti

1959-cu ilədək Nuxa pionerlər evində və Nuxa şəhər 7 №-li orta məktəbdə rəsm müəllimi, Ağdaş rayonunda tikintidə iş icraçısı, Nuxada tikintidə mühəndis, kommunal təsərrüfatı idarəsində şöbə müdiri, ticarət idarəsinin soyuducu qurğusunda rəis və s. vəzifələrdə çalışıb.

1959-cu ildən isə V.İ.Lenin adına Nuxa İpək Kombinatının parça tərtibatı üzrə rəssamı olub.

Digər

Hərbi xidmətdə olarkən hərbi qərargahda rəssam kimi fəaliyyət göstərib, çoxlu sayda döyüş yoldaşlarının və komandirlərin portretlərini çəkib və bu portretlərin şəkli ordu qəzetlərində tirajlanıb.

1959 – 1965-ci illərdə Şəki xan sarayının bərpasında iş icraçısı olub.

1973-cü ildə SSRİ Rəssamlar İttifaqına üzv qəbul edilib.

Təltif və mükafatları

SSRİ-də təşkil olunmuş bir çox sərgilərin diplomları, bir sıra döyüş və əmək medalları ilə təltif edilib. Böyük Vətən müharibəsi və əmək veteranı olub.

• “Azərbaycan SSR əməkdar rəssamı” fəxri adı (1988).

Vəfatı

7 dekabr 2010-cu il tarixdə – 86 yaşında, Şəkidə vəfat edib. Məhəmməd əfəndi qəbiristanlığında dəfn olunub.

Yaradıcılığından nümunələr

• 
  Həyətimiz (Şəki Dövlət Rəsm Qalereyası).
• 
  Gənc oğlan (Şəki Dövlət Rəsm Qalereyası).
• 
  Hacı Çələbi Nadir şahın hüzurunda, (polixrom, “Minali Butik” hoteli).
• 
  Hacı Çələbi Nadir şahın hüzurunda (monoxrom, 1981, Rəşid bəy Əfəndiyev adına Şəki Tarix-Diyarşünaslıq Muzeyi) .

Ədəbiyyat

1. Məmmədov Ə., Xalıqov F. İsmayılov İsmət // Şəki: Alim və ziyalılar. — Bakı: Elm, 2007. — 2 cilddə. — II  cild. — Səhifələrin sayı:  428. — Səh.: 204. — 600 nüsx. — ISBN 5-8066-1708-4.
2. Əməkdar rəssam İsmət İsmayılov "Həyətimiz" və "Gənc oğlan" əsərləri // Şəki Dövlət Rəsm Qalereyası (facebook səhfəsi). — 2017. — 25 iyul. — Müraciət tarixi: 06.09.2024.
3. Rəsulova Z. Çələbi xanla Nadir şahın görüşü təsviri sənətdə // Mədəniyyət : qəzet. — Bakı: Azərbaycan, 2024. — В. 4 sentyabr. —№ 65 (2130)  c. — Səh. 7. Arxivləşdirilib; arxivləşdirmə tarixi: 5 sentyabr 2024.

   Rəsulova Z. Çələbi xanla Nadir şahın görüşü təsviri sənətdə : [arx. 04.09.2024] // Mədəniyyət qəzeti. — 2024. — 4 sentyabr. — Müraciət tarixi: 04.09.2024.