İsmət İsmayılov

İsmət İsmayılov
İsmayılov İsmət Şirəli oğlu
İsmət İsmayılov.
Doğum tarixi	14 iyul 1924(1924-07-14)
Doğum yeri	Qudula, Şəki qəzası, Azərbaycan SSR, ZSFSR, SSRİ
Vəfat tarixi	7 dekabr 2010 (86 yaşında)
Vəfat yeri	Şəki, Azərbaycan
Dəfn yeri	Məhəmməd əfəndi qəbiristanlığı, Şəki, Azərbaycan
Vətəndaşlığı	SSRİ → Azərbaycan
Təhsili	Bakı Kommunal-Tikinti Texnikumu (1948–1952)
Mükafatları
Uşaqları	Hikmət (1953–2013) və Bahar
Həyat yoldaşı	Naimə Şəkixanova Məmmədxan qızı (1926–2010)
Adının digər versiyaları	Ismet Ismayilov, Ismat Ismailov, Исмәт Исмајылов, Исмат Исмаилов, Исмет Исмаилов

İsmət İsmayılov (1924–2010) — tanınmış rəssam, Azərbaycan SSR əməkdar rəssamı. Yaradıcılığının əsas istiqamətləri qrafika, rəngkarlıq (xüsusən, portret), tətbiqi sənət (parçaların bədii tərtibatı, ağac üzərində bədii oyma, nəqqaşlıq) idi.

Haqqında məlumatlar

14 iyul 1924-cü il tarixdə Şəki qəzasının Qudula kəndində anadan olub.

Təhsili

1934 – 1943-cü illərdə Nuxa şəhər 7 №-li orta məktəbində,

1948 – 1952-ci illərdə isə Bakı Kommunal-Tikinti Texnikumunda təhsil alıb.

Hərbi xidmətdə

1943-cü ilin avqust ayında ordu sıralarına çağırılıb. Böyük Vətən müharibəsinin qızğın çağında hərbi qərargahda rəssam olaraq çalışıb.

1947-ci ildə baş serjant (baş çavuş) rütbəsində ordudan tərxis edilib.

Əmək fəaliyyəti

1947-ci ildə Nuxa pionerlər evində və Nuxa şəhər 7 №-li orta məktəbində rəsm müəllimi,

1952 – 1959-cu illərdə Ağdaş rayonunda tikintidə iş icraçısı, Nuxada tikintidə mühəndis, kommunal təsərrüfatı idarəsində şöbə müdiri, ticarət idarəsinin soyuducu qurğusunda rəis,

1959 – 1965-ci illərdə Şəki xan sarayının bərpasında iş icraçısı,

1965-ci ildən isə V.İ.Lenin adına Nuxa İpək Kombinatında parça tərtibatı üzrə rəssam vəzifəsində çalışıb.

Digər

Hərbi xidmətdə olarkən sovet əsgərlərini qələbəyə çağıran plakatlar, alman faşistlərini lağa qoyan, ifşa edən karikaturalar, çoxlu sayda döyüş yoldaşlarının və komandirlərin portretlərini çəkib və bunların bir qismi ordu qəzetlərində tirajlanıb.

1973-cü ildə SSRİ Rəssamlar İttifaqına üzv qəbul edilib.

1960-cı illərinin ortalarından başlamaqla Şəki ipək kombinatında istehsal edilmiş məşhur “Krepdeşen”, “Qış günü”, “Paplin”, “Şəkili qız” və s adlı parçalar onun çəkdiyi süjetlər əsasında güllənib. Bununla yanaşı, akvarel və yağlı boya ilə də müxtəlif mövzularda tablolar yaradıb. Onlardan ən məşhurları “Hacı Çələbi Nadir şahın hüzurunda” adlı 51x72 sm ölçüsündə iki tablo olub. Birincisi kağız üzərində qrafika (ağ-qara), ikincisi isə yağlı boya ilə kətan üzərində işlənmiş rəngkarlıq əsəridir. Birincisi 1981-ci ildə Şəki Tarix-Diyarşünaslıq Muzeyinin fonduna daxil edilsə də, rəssam vəfat edənədək ikinci əsəri özündə saxlayıb və sağlığında heç kimə satmayıb. Vəfat etdikdən sonra isə Şəkidəki “Minali Butik” hotelinin rəhbərliyi tərəfindən həmin əsər ailəsindən satın alınaraq hotelin foyesində görkəmli yerdə divardan asılıb.

Təltif və mükafatları

• “1941–1945-ci illər Böyük Vətən müharibəsində Almaniya üzərində qələbəyə görə” medalı (1945);
• “Döyüş xidmətlərinə görə” medalı (1946);
• “1941–1945-ci illər Böyük Vətən müharibəsində qələbənin 20 illiyi” yubiley medalı (1965);
• Lenin yubiley medalı (1970);
• “1941–1945-ci illər Böyük Vətən müharibəsində qələbənin 30 illiyi” yubiley medalı (1975);
• “Əmək veteranı” medalı;
• “Azərbaycan SSR əməkdar rəssamı” fəxri adı – yüksək keyfiyyətli xalq istehlakı malları istehsalı sahəsində uzun illər fəal işlədiyinə və xidmətlərinə görə (aprel, 1988).

Vəfatı

7 dekabr 2010-cu il tarixdə – 86 yaşında, Şəkidə vəfat edib. Məhəmməd əfəndi qəbiristanlığında dəfn olunub.

Yaradıcılığından nümunələr

• 
  Həyətimiz (Şəki Dövlət Rəsm Qalereyası).
• 
  Gənc oğlan (Şəki Dövlət Rəsm Qalereyası).
• 
  Hacı Mustafayev (1924-1958), müəllim.
• 
  Hacı Çələbi Nadir şahın hüzurunda, (polixrom, “Minali Butik” hoteli).
• 
  Hacı Çələbi Nadir şahın hüzurunda (monoxrom, 1981, Rəşid bəy Əfəndiyev adına Şəki Tarix-Diyarşünaslıq Muzeyi) .

Ədəbiyyat

1. Həmidli T. İpək parçaları bəzəyir // Şəki fəhləsi : qəzet. — Şəki fəhləsi, 1975. — В. 15 iyun. — Səh. 4.
2. Əməyə görə mükafatlar // Kommunist : qəzet. — 1988. — В. 29 aprel.
3. Həmidli T. İsmət // Şəki fəhləsi : qəzet. — Şəki fəhləsi, 1988. — В. 12 may.
4. Məmmədov Ə., Xalıqov F. İsmayılov İsmət // Şəki: Alim və ziyalılar. — Bakı: Elm, 2007. — 2 cilddə. — II  cild. — Səhifələrin sayı:  428. — Səh.: 204. — 600 nüsx. — ISBN 5-8066-1708-4.
5. Əməkdar rəssam İsmət İsmayılov "Həyətimiz" və "Gənc oğlan" əsərləri // Şəki Dövlət Rəsm Qalereyası (facebook səhfəsi). — 2017. — 25 iyul. — Müraciət tarixi: 06.09.2024.
6. Rəsulova Z. Çələbi xanla Nadir şahın görüşü təsviri sənətdə // Mədəniyyət : qəzet. — Bakı: Azərbaycan, 2024. — В. 4 sentyabr. —65 (2130)  c. — Səh. 7. Arxivləşdirilib; arxivləşdirmə tarixi: 5 sentyabr 2024.

   Rəsulova Z. Çələbi xanla Nadir şahın görüşü təsviri sənətdə : [arx. 04.09.2024] // Mədəniyyət qəzeti. — 2024. — 4 sentyabr. — Müraciət tarixi: 04.09.2024.

7. Məmmədov A. Şəkidə bir rəssam vardı... // Mədəniyyət : qəzet. — Bakı: Azərbaycan, 2024. — В. 2 oktyabr. — № 73 (2138). Arxivləşdirilib; arxivləşdirmə tarixi: 3 oktyabr 2024.

   Məmmədov A. Şəkidə bir rəssam vardı... : [arx. 02.10.2024] // Mədəniyyət qəzeti. — 2024. — 2 oktyabr. — Müraciət tarixi: 02.10.2024.